შორსმხედველობა (ჰიპერმეტროპია) - ამეტროპიის სახე, რომლის დროსაც შორს მყოფი საგნებიდან მომავალი პარალელული სხივები ერთდებიან ბადურის უკან. შორსმხედველობა ყალიბდება იმის გამო, რომ თვალის კაკალს გააჩნია არასწორი ფორმა, ის თითქოს შევიწროებულია სიგრძივი ღერძის მიმართ. შედეგად, გამოსახულება ფოკუსირდება არა ბადურაზე, არამედ მის უკან. ხშირად თვალის კაკლის არასწორ ფორმას თან ახლავს რქოვანისა და ბროლის დაბალი ოპტიკური ძალა.

არსებობს შორსმხედველობის სამი ხარისხი და განისაზღვრება დიოპტრიების რაოდენობით, რომლებიც აკლია ჰიპერმეტროპიულ თვალს იმისთვის, რომ გახდეს ემეტროპიული: დაბალი ხარისხის ჰიპერმეტროპია არის -2.0 დიოპტრიამდე; საშუალო ხარისხის ჰიპერმეტროპია - 4,0 დიოპტრიამდე; მაღალი ხარისხის ჰიპერმეტროპია - 4,0 დიოპტრიაზე მეტი.

შორსმხედველ ადამიანს კითხვისას ტექსტი ახლო მანძილზე უჭირავს, რადგან ბადურაზე გამოსახულება ასე უფრო იზრდება. თუმცა გამოსახულება ამით არ უმჯობესდება, ის უბრალოდ ზომაში მატულობს. პაციენტი ხშირად “ჭუტავს თვალებს” რათა დაეხმაროს აკომოდაციას, რასაც ხშირად მოსდევს ბლეფარიტებისა და კონიუნქტივიტების პროვოცირება.

ახლო მანძილზე ხანგრძლივი მუშაობის შემდეგ ჰიპერმეტროპეპს აღენიშნებათ მხედველობითი დაღლილობა, თვალებისა და თავის ტკივილი, ცრემლდენა, წვა, ჩხვლეტითი შეგრძნებები. შეიძლება აღინიშნოს უსიამოვნო შეგრძნება სინათლის წყაროს მიმართულებით ყურებისას ან მკაფიო განათებისას, რასაც ეწოდება აკომოდაციური ასტენოპია. აკომოდაციური ასტენოპია მით უფრო ძლიერად არის გამოხატული, რაც უფრო მაღალია ჰიპერმეტროპიის ხარისხი.

სკოლამდელ ასაკში აუცილებელია მუდმივი კორექცია ლინზებით, ჰიპერმეტროპიის მცირე ხარისხის დროსაც კი. სკოლის მოსწავლეებსა და მოზრდილებში ჰიპერმეტროპიის მაღალი ხარისხის დროს ინიშნება სათვალეები ახლო მანძილებზე მუშაობისათვის. სწორი ოპტიკური კორექციის დროს მხედველობა შენარჩუნებულია. ასევე არსებობს შორსმხედველობის კორექციის ლაზერული და ქირურგიული მეთოდი. რეფრაქციულ ქირურგიას ირჩევს ის, ვისაც არ სურს სათვალის ტარება, ვერ ეგუება კონტაქტურ ლინზებს ან დაბალი მხედველობის გამო შეზღუდულია პროფესიის არჩევაში. გამოცდილებამ აჩვენა, რომ ლაზერულ კორექციას ადამიანი მიმართავს ჩვეული ცხოვრების წესის გაუმჯობესების მიზნით. მთავარი ჩვენება ექსიმერლაზერული ოპერაციის სასარგებლოდ მაინც ადამიანის სურვილია ხედავდეს კარგად სათვალის გარეშე. თუმცა ხშირად ბავშვთა ასაკში რეფრაქციული ანომალიების ლაზერულ კორექციას პირდაპირი სამედიცინო ჩვენებაც აქვს, რათა არ მოხდეს თვალის ე.წ. "გაზარმაცება" ანუ ამბლიოპიის განვითარება.